NAGBIGAY-PUGAY ang Parish Pastoral Council for Responsible Voting (PPCRV) kay Pangulong Rodrigo Roa Duterte sa Rizal Hall ng Malacañang noong Miyerkules, Agosto 4, 2016.
Pinuri ng PPCRV ang pagsisikap ng Pangulo na maibalik ang kapayapaan sa bansa at ang pagnanais nitong matugunan ang iba pang pangangailangan ng mga mamamayan gaya ng edukasyon, kasiguraduhan sa pagkain at ang prosesong pangkapayapaan.
Nanawagan si PPCRV National Chair Ambassador Henrietta De Villa kay Pangulong Duterte na wakasan na ang nakasanayang pagbili at pagbenta ng boto tuwing may halalan na sumisira sa kasagraduhan ng demokrasya. Hiniling din ni De Villa sa Pangulo na ipagpatuloy ang mabuting pamamahala na kanyang naumpisahan.
Sinabi ng Pangulo na tinanggihan niya ang campaign contribution ng mga indibidwal at kumpanya na may pansariling interes sa kanyang administrasyon. Aniya, “I owe no one, serve no vested interest but I do owe a debt of gratitude to the Filipino people.”
Sinabi niya sa mga lider ng PPCRV na hindi niya pinangarap na sumikat. Hindi aniya siya naging honor student samantalang ang mga kaibigan niya at kaklase ang nakatanggap ng pinakamataas na parangal.
“Destiny is God-given,” pahayag niya sa grupo.
Dahil nakuha niya ang tiwala at kumpiyansa ng mahigit 16 milyong botante sa nakaraang halalan kung saan nagdalawang isip pa siya sa pagtakbo, sinabi ni PRRD na may pangako siyang obligasyon para tulungan ang kaniyang mga kababayan.
Binigyan-diin din ni PRRD ang importansya ng ama at ina sa balangkas ng isang pamilya. Kung wala ang ama o ang ina sa pamilya ay malaki ang magiging epekto niyon sa emotional, social and psychological development ng bata. Nagiging dahilan din ito para ang isang bata ay malulong sa droga.
Ipinaliwanag niya na kailangan magwagi ng pamahalaan sa laban kontra droga at ang pangwawasak na ginagawa nito sa pamilya at sa bansa.
Bagama’t ang napalutang pa lang ng mga isinasagawang operasyon ng pulisya ay mga “lieutenants” at mga maliliit na dealer pa lang, itinuturing ni PRRD na ang mga indibidwal na ito ay mga “apparatus” na ginagamit ng mga drug lord sa pagpapatakbo ng kanilang ilegal na negosyo. Mahalaga rin aniya na masugpo ang mga ito para tuluyang mahinto ang problema sa droga.
Ani PRRD, “It is a war and not a crisis. Poverty is not an excuse. I need to destroy the apparatus to stop the proliferation of illegal drugs.”
Mahigit isang buwan pa lamang si PRRD bilang pangulo pero marami na siyang natupad sa kanyang mga pangako noong panahon ng kampanya. Dahil sa maganda niyang naipakikita sa pagtupad sa kanyang tungkulin nangako sa kanya ng suporta ang PPCRV at nanalangin na lalo pa siyang magtagumpay sa pagtupad sa pangarap ng bawat Pilipino ng tunay na pagbabago, tuluyang pagsugpo sa katiwalian at walang hanggang kapayapaan. (Ulat ng PND, KC Cordero)
0 comments:
Post a Comment